Update riba ley di iniciativa pa un sistema mas democratico pa alocacion di restzetels [video]

Democracia ta rekeri un sistema cu ta refleha e deseo di un pueblo. Un aspecto crucial di un democracia, ta eleccion. E meta di eleccion ta pa traduci tur e votonan valido den 21 asiento den Parlamento.

Nos democracia ta basa riba representacion proporcional. Esey ta significa cu si un partido logra 30% di e votonan valido, e lo mester haya alrededor di 30% di e asientonan den Parlamento. Si un partido logra 60% di e votonan valido, e lo mester haya alrededor di 60% di e asientonan den Parlamento. Lamentablemente, cu nos sistema existente, e resultadonan di eleccion por desvia substancialmente for di con pueblo a vota.

Por ehempel, un partido cu a logra 43% di e votonan valido, a haya 52% di e asientonan den Parlamento. Un partido cu a logra 48% di e votonan valido, a haya 57% di e asientonan den Parlamento. Y asina tin mas ehempel. E motibo principal pa e discrepancianan aki, ta nos sistema di parti restzetels.

“E meta di e ley ta pa percura cu e resultado di eleccion cuadra miho cu con pueblo a vota.”

Na maart 2022, Misha Raymond, lider di fraccion RAIZ, a entrega un concepto pa un ley di iniciativa, concipia door di Carlos Guiamo, pa cambia e sistema di aloca restzetels. E meta di e ley ta pa percura cu e resultado di eleccion cuadra miho cu con pueblo a vota. Mientrastanto Raad van Advies a duna su conseho riba e concepto di ley. E siguiente pasonan ta pa traha un nader rapport, cual ta e contestacion riba e conseho di Raad van Advies, y pa bay mas den contacto cu Pueblo pa duna splicacion y scucha opinion.

Cambiando e forma di aloca restzetels, dunando mas respet na e voz di pueblo, ta un paso importante pa hunto nos logra un Democracia Nobo pa Aruba.