Y asina un minister na Aruba por a keda sin bay Parlamento pa duna cuenta despues cu doorzoekingen a tuma luga na un departamento di Gobierno y na e Bureau di e minister, basa riba e sospecho di delitonan encuanto dunamento di permisonan di estadia/trabou, te cu e Minister mes a bira sospechoso.
Practicanan tradicional cu ta mina nos democracia pa decadanan caba, tin cu stop. MEP a demostra cu nan ta prefera baha Gobierno, na luga di goberna sin por call the shots den Parlamento. Cambio structural ta necesario. E no ta bay ta facil. Pero cu determinacion y consistencia, nos lo logra.
Desde 2021 mi a keda traha riba pasonan pa yega na un democracia nobo pa Aruba. Durante un conferencia di prensa di plataforma RAIZ mi a elabora riba algun desaroyo relaciona cu puntonan di campaña di 2021: Publico.aw, evaluacion pa introduci un Corte Constitucional pa Aruba, y Consultanan Publico.
Publico.aw ta un proyecto pa percura pa Transparencia Activo den Gobernacion, na un forma accesibel y innovativo. E ta un parti crucial di e maneho di integridad gubernamental.
Ta importante pa Aruba mantene e autoridad pa fiha prioridad, tuma decision cu ta defini su futuro, y pa esnan cu ta tuma decision cu ta afecta e pueblo di Aruba, duna cuenta na e pueblo di Aruba.
![Publico.aw, Corte Constitucional y Consulta Publico [video]](/content/images/size/w960/2024/08/CarlosGuiamo-press-conference-20240827-1.jpg)
