Misha Raymond (RAIZ) a entrega ley di iniciativa pa cambia e sistema di parti restzetels

Dia 22 di maart 2022, lider di fraccion di RAIZ Misha Raymond a entrega un ley di iniciativa na presidente di Parlamento. E ley di iniciativa ta encera un cambio den e sistema di parti restzetels. E concepto di ley a wordo skirbi door di mr. Carlos Guiamo (wetgevingsjurist y candidato di RAIZ).

Nos sistema electoral ta basa riba representacion proporcional (evenredige vertegenwoordiging). Basicamente, e meta di un eleccion ta pa traduci votonan den asiento na un forma proporcional. Esaki kiermen cu si pueblo duna un partido 35% di e votonan, bo lo kier pa e partido haya alrededor di 35% di e asientonan. Of si pueblo duna un partido 15% di e votonan, bo lo kier pa e partido haya alrededor di 15% di e asientonan. E realidad na Aruba ta cu votonan no ta wordo traduci den asiento na un forma debido. Resultadonan di eleccion tin discrepancianan substantial entre e deseo di e electorado (e votonan) y con asientonan ta wordo reparti.

Algun ehempel

• un partido cu a ricibi 48% di e votonan, a haya 57% di e asientonan;
• un partido cu a ricibi 43% di e votonan, a haya 52% di e asientonan;
• un partido cu a ricibi 35% di e votonan, a haya 43% di e asientonan.

E ley di iniciativa pa cambia e sistema di parti restzetels tin como meta y punto di salida pa yega na resultadonan di eleccion cu ta cuadra miho cu e votacion, y pues cu e deseo di electorado.

E proposicion a wordo presenta na (miembronan di) tur fraccion den Parlamento, y na presidente di Conseho Electoral. Dia 23 di maart 2022 Raad van Advies a ricibi e ley pa por duna su conseho. Nos ta keda en espera di e conseho di Raad van Advies y lo percura pa un presentacion extenso di e proposicion, pa asina pueblo por ta na altura di kico exactamente e cambio ta encera.