Dia 3 y 4 di November 2022 mi tawata tin e honor di presenta y ricibi feedback di cuater grupo riba un concepto di ley di Corporate Governance. Mi a haci esaki hunto cu sr. Arie Swaen, miembro di Commissie Corporate Governance.
E presentacionnan a forma parti di e Congreso Consultativo Corporate Governance. E congreso a tuma luga na Universidad di Aruba y a wordo organisa door di Commissie Corporate Governance y Themis Institute for Governance & Leadership, den cooperacion cu Ministerio di Transporte, Integridad, Naturalesa y Asunto di Adulto Mayor. Como hurista legislativo y consehero na Bureau di Minister Ursell Arends mi ta envolvi den e proceso di realisacion di un Landsverordening corporate governance y un Corporate Governance Code.
E congreso tawata un bon forma pa inclui stakeholders den e proceso di legislacion, duna splicacion, contesta preguntanan, scucha puntonan di preocupacion y sugerencianan. Esaki ta yuda nos yega na leynan cu ta funciona den practica y ta logra e meta di eleva e nivel di Good Corporate Governance den sector publico y semi-publico. E congreso tambe ta un ehempel di un forma di democracia participativo, locual ta pas den e vision di Ministerio di Integridad.
Participantenan a ricibi e documentonan relevante di antemano y por manda nan sugerencianan online durante por lo menos 3 siman despues di e congreso.
