Dia 4 di juni 2024, Landsrecherche, bou guia di hues-comisario y Ministerio Publico y den cooperacion cu Cuerpo Policial di Aruba y RST (Recherche Samenwerkingsteam), a tene doorzoekingen na seis sitio, y a confisca obhetonan. Algun detention ta wordo haci. Entre e sitionan tin dos instancia di Gobierno: DIMAS y Bureau di Minister Glenbert Croes den Bestuurskantoor (Cocolishi). E investigacion, cu a haya e nomber Portulaca, ta dirigi entre otro riba e sospecho di delitonan encuanto dunamento di permisonan di estadia/trabou entre 2020 te cu 2024.
Ministernan ta carga responsabilidad ministerial pa nan ministerio, y mester duna cuenta na Parlamento. E tarea principal di Parlamento ta pa controla Gobierno (ministernan). Ora doorzoekingen tuma luga na instancianan di Gobierno, a base di sospechonan di delitonan encuanto dunamento di permiso, obviamente Parlamento mester activa pa ta altanto di loke ta tumando luga y con Gobierno ta anda cu e situacion. Mas ainda ora e minister concerni no informa Parlamento riba su mes (uit eigen beweging).
Ora doorzoekingen tuma luga na instancianan di Gobierno, a base di sospechonan di delitonan encuanto dunamento di permiso, obviamente Parlamento mester activa pa ta altanto di loke ta tumando luga y con Gobierno ta anda cu e situacion.
Dia 7 di juni 2024, parlamentaria sra. Misha Raymond ta manda preguntanan dirigi na Minister Glenbert Croes (Statenvragen). Sra. Misha Raymond ta puntra:
- splicacion di e maneho cu e minister ta hiba pa cu otorgamento di permiso di estadia (incluyendo e toetsings-, beoordelings- en besluitmomenten);
- con e maneho pa otorgamento di permiso di estadia tawata prome cu a implementa e maneho actual;
- ki cambionan Minister Glenbert Croes a trece den e maneho desde cu el a bira e minister responsabel pa asuntonan di integracion (vreemdelingen - en integratiebeleid);
- si tin mas cambio cu e minister kier implementa, y si ta asina, cua cambionan y pakico;
- con e minister, como esun politicamente responsabel pa e maneho di stranheria y integracion, considerando e investigacion Portulaca y e sospechonan di Ministerio Publico, ta garantisa (waarborg) e integridad y confiabilidad di e proceso di otorgamiento di permiso di estadia.
E peticion di sra. Misha Raymond ta pa Parlamento ricibi e contestanan por escrito, pa Parlamento por analisa e informacion y tuma siguiente paso si ta necesario.
Dia 10 di juni 2024 (carta registra como ingekomen op 10 juni, data 8 juni), parlamentarionan sra. Gerlien Croes, sr. Miguel Mansur y sr. Ryçond Santos Do Nascimento ta manda un peticion pa un reunion publico na e Presidente di Parlamento di e tempo ey, sr. Edgard Vrolijk. E peticion tawata pa e Presidente di Parlamento yama un reunion publico mas pronto cu ta posibel cu como punto di agenda “de inspanningen van de minister [Glenbert Croes] om integriteitsschendingen onder zijn ministerie te voorkomen”.
Dia 19 di juni 2024, Minister Glenbert Croes ta manda contestanan por escrito riba e preguntanan di parlamentaria sra. Misha Raymond.
Conforme Reglement van Orde voor de Staten van Aruba, e Presidente di Parlamento tin cu percura pa e reunion cu a wordo pidi dia 10 di juni 2024 tuma luga dentro di 30 dia. Sr. Edgard Vrolijk no a cumpli cu esaki. Parlamento a bay den reces (vakantie) dia 11 di juli te 16 di augustus 2024. Despues di reces, keto bay e reunion no ta tuma luga.
Dia 29 di augustus 2024 (carta data 28 augustus 2024), parlamentarionan sra. Gerlien Croes, sr. Miguel Mansur y sr. Ryçond Santos Do Nascimento ta manda un rappel (recordatorio) na e Presidente di Parlamento pa yama e reunion publico cu nan a pidi dia 10 di juni 2024. E Presidente di Parlamento no ta yama e reunion.
Side note: E forma di procede di e ex-Presidente di Parlamento, uzando e funcion pa sirbi interes di su partido y proteha minister di su partido, ta un di e motibonan pakico Fraccion di RAIZ no a re-eligi sr. Vrolijk como Presidente di Parlamento, cu despues a conduci na entrega di retiro di Gabinete Wever-Croes 2 door di sra. Wever-Croes, y cu a disolve Parlamento.
Dia 9 di september 2024, Parlamento di Aruba ta eligi un Presidente di Parlamento nobo, sr. Raymond Kamperveen. E Presidente di Parlamento nobo ta tuma encargo di e debernan, entre nan un inventarisacion di reunionnan cu a wordo pidi pero no a wordo yama, bayendo bek te 2022.
Dia 8 di oktober 2024, prome cu e Presidente di Parlamento nobo yega na yama e reunion pendiente cu Minister Glenbert Croes, e minister ta bira un sospechoso den e investigacion Portulaca y ta wordo deteni. Ministerio Publico ta declara cu despues di e investigacion haci na e obhetonan confisca dia 4 di juni 2024, e sospecho contra e Minister a surgi. Segun fatsoen politico y ley, un minister tin cu entrega su retiro si e bira sospechoso den un investigacion penal di un misdrijf. Pues e mesun dia, 8 di oktober, sr. Glenbert Croes ta entrega su carta di retiro como minister.
Parlamento a cumpli?
Y asina un minister na Aruba por a keda sin bay Parlamento pa duna cuenta despues cu doorzoekingen a tuma luga na un departamento di Gobierno y na e Bureau di e minister den Bestuurskantoor, basa riba e sospecho di delitonan encuanto dunamento di permisonan di estadia/trabou, te cu e Minister mes a bira sospechoso y entrega su retiro. E Minister a contesta preguntanan (Statenvragen) di un parlamentaria si. Pero e peticion pa un reunion publico no a wordo honra. Den mi opinion, Parlamento como instituto no a cumpli debidamente cu su tarea principal di controla Gobierno.
Den mi opinion, Parlamento como instituto no a cumpli debidamente cu su tarea principal di controla Gobierno.
Un reunion publico tawata na su luga. Mas ainda despues cu (ex-)Minister Glenbert Croes a contesta e preguntanan di parlamentaria Misha Raymond, cu cada parlamentario por a analisa pa prepara pa tene un reunion publico efectivo. Un reunion publico pa un minister duna cuenta despues di doorzoekingen den instancianan di Gobierno y un investigacion penal andando, no mester ta pa crea sensacion, acusa un minister, of ‘automaticamente’ bin cu mocion di desconfianza. E mester ta un reunion pa Parlamento yega na e informacion necesario pa controla Gobierno, y si Parlamento ta haya necesario, por duna ‘instruccion’ na e minister concerni of tuma otro paso a base di (falta di) informacion. Esaki ta rekeri madurez politico tanto di politiconan den un coalicion como politiconan den oposicion.
Change the System
Mi ta keda ripiti: we need to change the system. E politica tradicional di laga parlamentarionan y un Presidente di Parlamento proteha ‘nan’ ministernan na luga di duna Parlamento e espacio pa cumpli cu su tarea di controla Gobierno, mester cambia. E practica aki tin como consecuencia cu ful nos sistema di checks and balances democratico no ta funciona, y Pueblo ta esun cu ta sali perdi.
Cambio structural ta necesario. Cambionan manera transparencia activo y reforma di nos sistema democratico, incluyendo eleccion separa pa Parlamento y pa Minister. Asina Parlamento por tin mas legitimidad democratico, sin parlamentarionan cu a drenta Parlamento pa motibo cu esunnan eligi a bira minister, cu por crea e situacion cu esun cu tin cu controla un minister, ta depende di e mesun minister pa su posicion y futuro politico. Esaki ta un fayo di nos sistema. Cambiando e sistema, nos por percura pa miho representacion di‘bo como ciudadano, miho checks and balances, y mas influencia participativo di Pueblo.
Pa realisa cambionan structural den con nos democracia ta funciona, no ta bay ta facil. Pero cu determinacion y consistencia, nos lo logra. #ChangeTheSystem
![Publico.aw, Corte Constitucional y Consulta Publico [video]](/content/images/size/w960/2024/08/CarlosGuiamo-press-conference-20240827-1.jpg)
