Dia 4 di april 2023 e Prome Ministernan di Aruba, di Corsou y di Sint Maarten, y e Secretario di Estatdo di relacionnan di reino, a firma e Onderlinge regeling samenwerking bij hervormingen. Esaki ta un acuerdo entre e gobiernonan cu ta regla con Aruba y Hulanda lo traha hunto riba implementacion di e reformanan den e landspakket. Mescos ta conta pa Corsou hunto cu Hulanda, y Sint Maarten hunto cu Hulanda.
Mi a tuma nota di diferente expresion, conclusion y pregunta tocante e Onderlinge regeling samenwerking bij hervormingen. Mi lo adresa esunnan cu mas a resalta.
Tin diferencianan significativo entre Rijkswet COHO y Onderlinge regeling samenwerking bij hervormingen?
Un aspecto fundamental di un democracia ta cu esnan cu ta tuma decisionnan gubernamental pa un pueblo, ta para responsabel y tin cu duna cuenta na pueblo pa e decisionnan tuma. Esaki ta tuma luga den un forma indirecto via Parlamento, y den un forma directo por medio di eleccion. Rijkswet COHO lo a kibra e cadena di responsabilisacion aki.
Rijkswet COHO ta inclui un mecanismo legal (via Statuut y Reglement van Orde voor de Gouverneur) cu ta haci posibel cu Hulanda por forsa Aruba pa implementa reforma y medidanan den e landspakket, pa 6 aña largo. Den otro palabra, a pesar di posibel desaroyonan nobo na Aruba relaciona cu nos situacion (socio)economico, laboral, financiero, of si Parlamento no ta di acuerdo cu cambionan proponi of con kier duna forma na implementacion di e landspakket, Rijkswet COHO lo a duna Hulanda un instrumento legal pa forsa Aruba pa haci’e toch, sin cu Gobierno di Hulanda ta responsabilisa su decisionnan na e pueblo di Aruba cu ta wordo afecta pa e reforma y medidanan. Esaki ta bay contra aspectonan fundamental di nos democracia y nos autonomia.
Rijkswet COHO lo a mara no solamente Gobierno di Aruba, pero tambe Parlamento di Aruba. Tur esaki no ta e caso pa e Onderlinge regeling samenwerking bij hervormingen. E areglo aki ta keda den e cuadronan existente di nos structura estatal, y cu esey Parlamento ta mantene su autoridadnan.
Cu e Onderlinge regeling samenwerking bij hervormingen, gobierno di Hulanda por para nan yudansa (financiero/experticio) si nan no ta di acuerdo con Aruba ta implementa e landspakket. Esey ta nan derecho. Pero nan no por forsa Aruba legalmente pa haci cierto implementacion. Cu Rijkswet COHO si nan lo a haya e instrumentonan legal pa forsa implementacion.
Otro cambionan ta inclui cu no ta bin un instancia cu autoridadnan cu ta afecta gobernacion, sin cu mester duna cuenta (COHO). Tampoco ta duna College Aruba financieel toezicht mas autoridad, cual tambe lo a afecta nos autonomia. Ademas e Onderlinge regeling samenwerking bij hervormingen ta bay acompaña pa un werkwijzereglement cu den practica lo yuda trece un miho balans entre e organisacionnan di Aruba y di Hulanda ora di traha hunto pa ehecuta proyectonan di e landspakket.
E diferencianan entre Onderlinge regeling samenwerking bij hervormingen y Rijkswet COHO ta significante pa nos democracia, nos autonomia, y cooperacion cu Gobierno Hulandes. Klik aki pa mas informacion tocante e diferencianan entre e Onderlinge regeling y Rijkswet COHO.
Parlamento a wordo pon’i “buiten spel” cu Onderlinge regeling samenwerking bij hervormingen?
Rijkswet COHO mester a bira un consensusrijkswet, cu ta encera cu Parlamento ta wordo envolvi den e proceso legislativo. Onderlinge regeling samenwerking bij hervormingen no ta un rijkswet, pero ta un acuerdo entre gobiernonan. E onderlinge regeling no tin e peso di un rijkswet y no tin un trayecto legislativo cu ta inclui Parlamento. Pues bo lo por bisa cu Parlamento su rol den yega na e acuerdo entre gobiernonan por medio di e onderlinge regeling, ta menos compara cu e proceso legislativo di un rijkswet. Pero esaki ta bisa nada di e contenido di e rijkswet of e areglo, ni di e rol di Parlamento den ehecucion di sea e rijkswet of e areglo.
Rijkswet COHO lo a mara Gobierno y Parlamento di Aruba na implementacion di e landspakket, limitando e espacio cu Parlamento mester tin den nan autoridad di controla gobierno y di presenta, aproba, amenda y desaproba proposicionnan di ley.
Onderlinge regeling samenwerking bij hervormingen no ta mara Parlamento. Pa e motibo ey, aunke Parlamento no tin un rol directo den acorda e Onderlinge regeling samenwerking bij hervormingen, nan rol den implementacion di e landspakket ta miho regla compara cu den Rijkswet COHO.
Ademas por menciona cu Gobierno a tene cuenta cu e reclamonan di Parlamento riba Rijkswet COHO ora di presenta e proposicion pa na luga di Rijkswet COHO yega na un onderlinge regeling, y ora di negocia y traha riba e onderlinge regeling hunto cu Corsou, Sint Maarten y Hulanda. Tambe a duna diferente presentacion y a contesta preguntanan den Parlamento di Aruba, prome cu a firma e acuerdo. Naturalmente Parlamento por yama Gobierno pa bin duna cuenta despues di a cera e acuerdo tambe. Parlamento su posicion a wordo proteha door di kita Rijkswet COHO for di mesa y yega na un acuerdo pa e Onderlinge regeling samenwerking bij hervormingen.
Relacionnan den reino Hulandes
E proceso di negocia con un landspakket lo wordo implementa, a inicia na juli 2020 y a termina na april 2023. Tin varios les pa siña di e proceso aki, pero mi kier subraya cu e Onderlinge regeling samenwerking hervormingen ta presenta e paisnan den reino un oportunidad pa un cooperacion basa riba mas comprondemento, igualdad y respet. Un cooperacion fructifero y duradero no por wordo imponi. Mester tin boluntad y seriedad di ambos banda, pa hunto logra lo maximo pa e ciudadanonan di e paisnan den reino.
Pa mas informacion tocante cu e Onderlinge regeling samenwerking bij hervormingen por wak e presentacion den Parlamento di 30 di maart 2023 akibou. Tambe por download un PDF di loke e miembronan di Parlamento por a wak durante e presentacion.
01:30 Minister-President na palabra
09:15 Presentacion Carlos Guiamo
23:00 Pregunta y contestacion
Klik aki pa e download e Onderlinge regeling samenwerking bij hervormingen, y documentonan relaciona.
Klik aki pa download e concepto di Rijkswet COHO, y documentonan relaciona.
